Endurvinnsla er orð yfir það ferli að nýta sorp og gefa hlutum nýjan tilgang til að koma í veg fyrir óþarfa eyðslu á efnum sem hægt væri að nýta aftur og draga úr neyslu á hráefnum, orkunotkun, mengun og losun gróðurhúsalofttegunda. Sorp sem hægt er að endurvinna er t.d. gler, pappír, málmar, malbik, bylgjupappi, fatnaður og sum plastefni. Moltugerð úr lífrænum úrgangi t.d. garðúrgangi og matarleifum telst líka endurvinnsla. Það eru margar ástæður fyrir því að það er gagnlegt fyrir umhverfið okkar að endurvinna, t.d. dregur það úr magni úrgangs sem sent er á ruslahauga og í brennslu, varðveitir náttúruauðlindir, s.s. timbur, vatn og steinefni, kemur í veg fyrir mengun, sparar orku og hjálpar til við að viðhalda umhverfinu fyrir komandi kynslóðir.